Ei oppsummering

Allereie etter to veker kan eg slå fast at læraryrket er slankande.

Høgdepunkt frå august

Det er hektiske arbeidsdagar og dårleg med blogging for tida. Eg saknar å ha tid til sy- og strikkeprosjekt og tid til å pusla med foto. Særleg no når september snart er her, og det blir mørkare og kaldare dagar. Eg håpar det går seg til.

For eit par veker sidan var vi i bryllaupet til Marit og Even i Jostedalen, og det var nok det kjekkaste som skjedde i august. Dei gifta seg i lett yr ved Nigardsbreen. Brura hadde bryllaupsstøvlar på og den finaste brurebuketten eg nokon gong har sett. Vi åt verdas største og søtaste økologiske bringebær. Og dansa. Og sjølv om eg fraus på meg både det eine og det andre, kjem eg aldri til å slutta å seia Å Vestland, Vestland!

Stripestrikk!

Denne jakka har eg strikka til ein krabat som blir fødd om nokre månader. Det var eit veldig artig strikkeprosjekt på grunn av stripene. Det geniale er at ein ikkje treng å fella av – jakka får fasong av at ein strikkar ulike lengder på stripene. (Ein strikkar altså ikkje nedanfrå og opp, men sidelengs og rundt.)


Eg brukte grått, gult og mørkebrunt garn, men her er det jo berre å bruka fantasien, alt etter kva garn ein har liggjande.


Eg sydde i fire ulike knappar som eg kjøpte i ein bruktbutikk, og det blei jo ganske fint.


Oppskrifta er frå Strikk til nøstebarn – ein stor favoritt!

Furuer med utsikt

Glutenfri nettbutikk

(Klikk på bileta for å sjå dei større)

Ha-ha-ha, på nettet kan ein finna ALT. Desse herlege trøyene fann eg her, og eg har tenkt å kjøpa éi av dei, men det er vanskeleg å velja, gitt!

Nye kreative prosjekt

Eg har surfa rundt på nettsidene til Garnstudio, og som vanleg har eg funne mykje fint eg har lyst til å laga ... Den hekla kyllingen ser ut til å vera eit glimrande restegarn-prosjekt. Eg har ein del bomullsgarn liggjande, og det er jo berre å bruka fargar i hytt og pine, alt etter kva ein har liggjande. (Men det blir ingen rosa kyllingar, nei. Kyllingen kan jo ha grøn kjole, t.d.). Genseren vurderer eg å strikka til mamma. Eg elskar raglanfelling og mønster heile vegen, så det ser ut som eit kjekt prosjekt.

Kattekopp!

Når ein ikkje har ein levande katt i hus, tykkjer eg denne koppen er ei fin erstatning. Diverre er han litt for dyr til at eg vil prioritera å kjøpa han. Eg har henta bileta frå nettbutikken ModCloth – ein fantastisk nettbutikk som også har utruleg fine kjolar! Dream on ...

Soloppgang

Når eg ser eit slikt syn kl. 03.46 om natta/morgonen fordi eg tilfeldigvis måtte opp i eit nødvendig ærend, er det nesten så eg vurderer å gå i terapi for å greia å bli a-menneske. Ev. må b-mennesket i meg greia å vera oppe så lenge. Det siste er nok enklast.

Eg har fått meg endå ei ny dame: La Roux

Eg har oppdaga La Roux. Eller Elly Jackson, som ho eigentleg heiter. Ho er 21 år og har den lengste og mest vassrette panneluggen eg nokon gong har sett. Musikken er ein artig miks av synthpop, Genesis og andre 80-talsrytmar. Ho gir meg gode vibbar! Eg vil særleg tilrå å høyra "Quicksand". Her er ei anna låt med eit klassisk tema. Enjoy:

Mjosundet

Det er ikkje ordentleg ferie før eg har kome heim til Mjosundet!

Best of Stockholm

Rosendals Trädgårdskafé
Kvar: på Djurgården
Konsept: kjøp deg ein rettvis kaffi og økomat og sleng deg ned i trädgården, anten i graset eller på ein benk. Ein kan også kjøpa te, honning, nøtter, brød, osv. i trädgårdsbutikken, som er laga av råvarer som er dyrka der. Ah, dette var den beste kafeen i heile Stockholm. Sjekk utsikta:


Dette var kafetreet vårt:


Fjäderholmarna
Kvar: 30 min med båt frå hamna. Vi var på Stora Fjäderholmen.
Konsept: koma seg vekk frå storbylarmen ved å gå tur i det grøne, med vind i håret og sjøluft i nasen – ein kan gå rundt holmen på 20–25 minutt – eta lunsj i det grøne eller på ein restaurant, sjå skärgårdsteater, sjå på og kjøpa handverksting og -tang (nokre kunstnarar held til der) ... Her er bygget der smedjan, träboden og glasverkstaden heldt til:


Vi åt ein utruleg enkel og god salat på holmen (på den billegaste plassen rett ved båthamna):

Røykalaks, mango, reddik og fetaost var ein fantastisk bra kombinasjon! Og så fargerik mat da, gitt! Nam, nam.

Og elles hamna vi heilt tilfeldigvis her (jf. førre blogginnlegg) ...:


Shopping blei det ikkje så mykje av. Vi fekk liksom aldri heilt taket på byen. Og merkeleg nok var det veldig mange sommarstengde butikkar (og restaurantar)! (... sjølvsagt dei vi hadde sett oss ut) . Men det var kanskje like greitt. Vi treng jo eigentleg ikkje noko!

Stockholm!

Stockholm. Kvar gong nokon nemner byen, tenkjer eg automatisk på drapet på Olof Palme 28. februar 1986. Det er rart korleis denne hendinga klistra seg fast til netthinna mi og berre blei der. Eg hugsar nyhendene og alt snakket om kven som kunne vera mordaren. Eg lurte mykje på kven han var, og kvar han var. Som 11 år gammal jente i ei lita, trygg bygd blei Stockholm for meg ein skummel by, der ein farleg mordar gjekk laus med pistol på innerlomma og kunne skyta kven som helst.

Ok, det er på tide å få litt andre førestellingar om byen. I dag reiser vi på impulsiv tur til denne skumle byen i aust, der det er meldt sol og finvêr og alt ligg til rette for å nyta at det er FERIE. Gler meg!

Ei skummel bakgate i Stockholm, som kanskje ikkje er så skummel likevel. Kjelda til biletet ligg her.